Friday

Ada Supuwatha අද සුපුවත-ඔක් 14,සෙනසුරාදා -දිව්‍ය පූජාවේ සියලුම කියවීම්


පළමු කියවීම /ජෝවෙල් 3:12-21

12 ''ජාතීහු සැරසී ජෙහෝෂාපාට් මිටියාවතට නැඟිට එත් වා!
මන්ද, අවටින් සිටින සකල ජාතීන් විනිශ්චය කිරීමට මම එහි අසුන් ගන්නෙමි. 
13 අස්වැන්න පැසී ඇති බැවින් දෑකැත්ත යොදන්න; 
මිදි යන්ත්‍ර පිරී ඇති බැවින් ඇතුළට ගොස් පාගන්න; 
ඔවුන්ගේ නපුරුකම් අධික බැවින් බඳුන් උතුරා යයි.'' 
14 කෝටි සංබ්‍යාත මහා ජනකායක් තීන්දු දීමේ මිටියාවතේ රැස් වී සිටිති. 
තීන්දු දීමේ මිටියාවතෙහි සමිඳුන්ගේ දවස ළං ව ඇත. 
15 ඉර හඳ අඳුරු වී ඇත; 
තරුවල දීප්තිය නිවී ගොස් ඇත.16 සමිඳාණෝ සියොන්හි ගර්ජනා කරන සේක; 

ජෙරුසලමේ සිට හඬ නඟන සේක. 
අහසත් පොළොවත් කම්පා වනු ඇත. 
එහෙත්, සමිඳාණෝ සිය සෙනඟට රක්ෂා ස්ථානයක් වන සේක.
ඉශ්රායෙල් ජනයාට බලකොටුවක් වන සේක. 
17 ''ඉශ්රායෙල් ජනයෙනි, මෙසේ මා, ඔබේ දෙවි සමිඳුන් බව ඔබ දැනගන්නහු ය.
මම සියොන් නම් මාගේ ශුද්ධ කන්දේ වැඩ වාසය කරමි. 
ජෙරුසලම ශුද්ධ නගරයක් වන්නේ ය. 
විජාතීහු මින්පසු එය මැදින් නොයන්නාහු ය. 
18 ඒ කාලයේ දී, කඳුවලින් මිදියුස වෑස්සෙනු ඇත; 
හෙල්වලින් කිරි ගලා යනු ඇත. 
ජුදාහි සියලු ඇල දොළවල වතුර පිරෙනු ඇත. 
සමිඳුන්ගේ මාලිගාවෙන් උල්පත් නික්ම ෂිට්ටිම් මිටියාවතට වතුර දෙනු ඇත. 
19 ජුදා වැසියන්ට බලහත්කාරකම් කොට, ඒ රටේ මිනිසුන් මරාදැමූ නිසා මිසර දේශය පාළුකරයක් වන්නේ ය.
ඒදොම් රට මරුකතරක් වන්නේ ය. 
20 ජුදාහි සදහට ම ද ජෙරුසලමේ පරම්පරාවෙන් පරම්පරාවට ද සෙනඟ වාසය කරනු ඇත.
21 මන්ද, සමිඳාණෝ සියොන් කන්දේ වැඩ වාසය කරන සේක. 
සියලු වරදකරුවන්ට මම දඬුවම් දෙමි. 
ඔවුන්ගේ ලේ වැගිරීමේ වරද ගැන මම පළිගනිමි.''


පිළිතුරු ගීය :දැහැමියන් සමිදුන් තුල ප්‍රීති ප්‍රමෝද වෙත්වා

1 සමිඳාණෝ රජකම් කරන සේක, මිහිතලය ප්‍රීති වේ වා! 
දිවයින් සියල්ල ප්‍රීති ප්‍රමෝද වේ වා! 
2 වලාකුළු සහ අඳුර එතුමන් වට කර සිටින්නේ ය. දැහැමිකම සහ යුක්තිය එතුමන්ගේ සිහසුනේ පදනම් ය.

5 කඳු හෙල් සමිඳාණන් දැක ඉටි මෙන් උණු වන්නේ ය;
මුළු මිහිතලය ද සමිඳුන් දැක එසේ වන්නේ ය. 
6 දෙව්ලොව එතුමන්ගේ සාධාරණකම ප්‍රකාශ කරන්නේ ය; 
සකල ජනතාවෝ එතුමන්ගේ මහිමය නරඹන්නෝ ය. 

11 දැහැමියන් මත එළිය බබළයි; 
යහපත් අය මත සතුට දිළිසෙයි. 
12 සැදැහැවතුනි, සමිඳුන් තුළ ප්‍රීති ප්‍රමෝද වෙත් වා!
එතුමන්ගේ සුවිශුද්ධ භාවය සිහි කොට එතුමන්ට ප්‍රශංසා කරත් වා!


සුවිශේෂය /ලූක් 11:27-28

27 උන් වහන්සේ මෙ‍වදන් පවසද්දී, සමූහයා කෙරෙන් එක් ස්ත්‍රියක් හඬනඟා, ''ඔබ දැරූ කුසය ද ඔබට කිරි දුන් පියයුරු ද භාග්‍යවන්ත ය''යි උන් වහන්සේට කීවා ය. 28 උන් වහන්සේ ද, ''එසේ ය, දෙවියන් වහන්සේගේ වචනය අසා එය පිළිපදින අය ඊටත් වඩා භාග්‍යවන්ත ය''යි වදාළ සේක.

Thursday

Ada Supuwatha අද සුපුවත-ඔක් 13,සිකුරාදා -දිව්‍ය පූජාවේ සියලුම කියවීම්


පළමු කියවීම /ජෝවෙල් 1:13-15,2:1-2

13 ''පූජකවරුනි, ගෝණි රෙදි ඔතාගෙන වැලපෙන්න. 
පුදසුනේ සේවකයෙනි, කෑමොරගසන්න. 
පූජකවරුනි, ගෝණි රෙදි පොරවාගෙන මුළු රැයක් වැතිර සිටින්න. 
මන්ද, ඔබේ දෙවි සමිඳාණන් වහන්සේගේ මාලිගාවේ පිදීමට ආහාර පූජාවත්, පානීය පූජාවත් කිසිත් නැත. 
14 උපවාසයක් නියම කරන්න; 
අයැදුමට සෙනඟ රැස් කරන්න. 
ප්‍රජා මූලිකයන් සහ රටේ සියලු වැසියන් ඔබේ දෙවි සමිඳාණන් වහන්සේගේ මාලිගාවට රැස් කරවා උන් වහන්සේට මොරගසන්න.
15 අහෝ!
ඒ දවස, සමිඳාණන් වහන්සේගේ දවස, ආසන්න ව ඇත. 
එය සර්ව පරාක්‍රමයාණන් වෙතින් විනාශයක් සේ පැමිණෙනු ඇත. 


1 ''සියොන්හි හොරණෑව පිඹින්න; 
දෙවිඳුන්ගේ ශුද්ධ කන්දේ අනතුරු හඬ නඟන්න. 
දේශයේ සියලු වැසියෝ වෙවුලත් වා! 
මන්ද, සමිඳාණන් වහන්සේගේ දවස පැමිණේ. 
එසේ ය, එය ආසන්න ය. 
2 ඒ දවස කළුවර අඳුරු දවසක් ය; 
වලාකුළු සහිත ගන අඳුරු දවසක් ය. 
ගන අඳුර කඳු පිට පැතිර යන්නාක් මෙන් මහා හමුදාවක් පැමිණෙන්නේ ය.
එවැන්නක් කිසි කලෙක නො වී ය; 
මතු පරම්පරාවල කවදා වත් නොවන්නේ ය.


පිළිතුරු ගීය :සමිදාණෝ දැහැමි කමින්  විනිශ්චය කරන සේක 

2 ඔබ ගැන සිත සිතා කුල්මත් වී උදන් අනන්නෙමි; 
මහෝත්තමයාණෙනි, ඔබේ නම ප්‍රශස්ති ගීතයෙන් පසසන්නෙමි. 
3 ඔබේ ආගමනය නරඹා සතුරෝ පසු බැස යති; පැකිළ වැටෙති, වැනසෙති. 

6 සතුරන්ගේ නගර සුණු විසුණු කර ඇත. ඒවායේ නම්ගම් මතකයෙන් පහකර ඇත. ඔවුන් සදාකල් විනාශයට පැමිණෙවු සේක.

16 සමිඳාණෝ යුක්තිය ඉටු කොට ප්‍රකාශ වූ සේක. 
කුදිටු දනෝ තමන් හෙළන උපා දැලේ පැටලී සිටිති. 



සුවිශේෂය /ලූක් 11:15-26

15 එහෙත් ඔවුන්ගෙන් සමහරෙක් කතා කොට, ''මොහු දුෂ්ටාත්මයන් දුරු කරන්නේ දුෂ්ටාත්මාධිපති වූ බෙල්සෙබුල්ගේ අනුහසින් ය''යි කී හ. 16 අන් සමහරු උන් වහන්සේ වචනයකින් අල්ලාගන්න පිණිස, ස්වර්ගයෙන් හාස්කමක් උන් වහන්සේගෙන් ඉල්ලූ හ. 17 උන් වහන්සේ ඔවුන්ගේ සිතුවිලි දැන මෙ‍සේ වදාළ සේක: ''ඊට ම විරෝධී ව භේද වූ යම් රාජ්‍යයක් ඇද්ද එය පාළු වන්නේ ය, ඊට ම විරෝධී ව භේද වූ යම් ගෙදරක් ඇද්ද එය පිරිහී යන්නේ ය. 18 සාතන් ඔහුට ම විරෝධී ව භේද ව සිටී නම් ඔහුගේ රාජ්‍යය පවතින්නේ කෙසේ ද? මා දුෂ්ටාත්මයන් දුරු කරන්නේ බෙල්සෙබුල්ගේ අනුහසින් යයි ඔබ කියන්නාහු ය. 19 එහෙත් මම බෙල්සෙබුල්ගේ අනුහසින් දුෂ්ටාත්මයන් දුරු කරම් නම්, ඔබගේ අනුගාමිකයෝ කවරකුගේ අනුහසින් ඔවුන් දුරු කරද් ද? මෙ‍ලෙස ඔබේ අනුගාමිකයෝ ම ඔබේ තර්කය බිඳදමති. 20 එහෙත් මම දෙවියන් වහන්සේගේ අනුහසින් දුෂ්ටාත්මයන් දුරු කරම් නම්, සැබැවින් ම දෙවියන් වහන්සේගේ රාජ්‍යය ඔබ කෙරෙහි උදා වී ඇත. 21 අවිආයුධ ගත් බලවන්තයකු සිය නිවස රක්නා කල ඔහු සතු දේපළ සුරක්ෂිත ව ඇත. 22 එහෙත් ඔහුට වඩා බලවන්තයෙක් අවුත් ඔහු මැඩපවත්වන්නේ නම්, ඔහු විශ්වාසය තැබූ ආයුධ පැහැරගෙන, කොල්ලකාගත් දේ බෙදාගන්නේ ය. 23 මාගේ පක්ෂයට නොවන්නා මට විපක්ෂ ය; මා සමඟ රැස් කිරීමට උදව් නොකරන්නා විසුරුවා දමන්නේ ය.''

24 ''අශුද්ධාත්මය මිනිසකුගෙන් දුරු ව ගිය කල, ඔහු දිය නැති තැන්වල සැරිසරමින්, නවාතැනක් සොයන්නේ ය, එය නොලදහොත් 'මා නික්ම ආ මාගේ නිවසට ආපසු යමි'යි කියන්නේ ය. 25 ඔහු එහි පැමිණි කල, නිවස අතුගා අස්පස් කොට තිබෙනු දකියි. 26 එවිට ඔහු ගොස් තමාට වඩා අශුද්ධ වූ තවත් ආත්මයන් සත් දෙනෙකු තමා කැටුව ගෙන එන්නේ ය. ඔව්හු ඒ නිවසට පිවිස එය අරක්ගනිති. එවිට ඒ පුද්ගලයාගේ දෙ වන තත්ත්වය පළමු තත්ත්වයට වඩා නපුරු වන්නේ ය.''



Wednesday

Ada Supuwatha අද සුපුවත-ඔක් 11 බදාදා -දිව්‍ය පූජාවේ සියලුම කියවීම්


පළමු කියවීම /ජෝනා 4:1-11

1 ජෝනා ඊට අතිශයින් අප්‍රසන්න ව කෝප විය. 2 ඔහු සමිඳාණන් වහන්සේට මෙසේ යාච්ඤා කෙළේ ය: ''අහෝ සමිඳුනි, මාගේ රටේ මා සිටිය දී, මා කීවේ මෙය ම නොවේ ද? තර්ෂිෂ්ට පලා යන්නට මා ඉක්මන් වූයේ එබැවිනි. මන්ද, ඔබ දයාවන්ත, අනුකම්පා සහගත, වහා නොකිපෙන සුලු, ඉතා කරුණාවන්ත, විපත්ති පැමිණ වීමට නොකැමැති දෙවි කෙනෙකු බව මම දැනගෙන සිටියෙමි. 3 ඉතින් සමිඳුනි, මාගේ ප්‍රාණය මාගෙන් තුරන් කළ මැනව. ජීවිතයට වඩා මරණය මට හොඳ ය.'' 
4 සමිඳාණන් වහන්සේ ජෝනා අමතා, ''කෝප වීම නුඹට යුතු දැ''යි ඇසූ සේක. 
5 එවිට ජෝනා නගරනේ පිටතට ගොස් නගරයට නැගෙනහිරෙන් හිඳගත්තේ ය. ඔහු එහි පැලක් සාදාගෙන නගරයට කුමක් සිදු වේ ද කියා බලන පිණිස එහි සෙවණ යට හිඳගත්තේ ය. 6 දෙවි සමිඳාණන් වහන්සේ, ජෝනා ඔහුගේ දුකින් මුදන පිණිස ලබු වැලක් වැඩෙන්නට නියම කර, ඔහුගේ හිසට උඩින් එය සෙවණක් සේ යන්නට සැලැසූ සේක. ජෝනා ලබු වැල ගැන ඉතා ප්‍රීති විය. 
7 එහෙත්, පසු දා පහන් වූ විට ලබු වැල කන පිණිස පණුවෙකු ඇති වන්න දෙවියන් වහන්සේ සැලැසූ සේක. ඌ ලබු වැල කෑ විට එය වියළී ගියේ ය. 8 තවද, ඉර උදා වූ කල, ඉතා උෂ්ණ සුළඟක් පෙරදිගින් හමන්න උන් වහන්සේ නියම කළ සේක. අවුරශ්මිය ජෝනාගේ හිසට වැදී ඔහු ක්ලාන්ත වී, ''ජීවිතයට වඩා මරණය හොඳ ය'' කියා සිය ප්‍රාණය හානි කරන ලෙස යාච්ඤා කෙළේ ය. 
9 එවිට දෙවියන් වහන්සේ, ''ලබු වැල ගැන කෝප වීමට නුඹට යුතු දැ''යි ජෝනාගෙන් ඇසූ සේක. ''මැරෙන තරම් කෝප වීම මට යුතු ය''යි ඔහු කීවේ ය. 
10 එවිට සමිඳාණන් වහන්සේ ජෝනා අමතා, ''නුඹේ ශ්‍රමය වත්, වගාව වත් නැති ව එක රැයකින් ඇති වී, එක රැයකින් නැති වී ගිය ලබු වැල ගැන නුඹ අනුකම්පා කෙළෙහි නම්, 11 තමන්ගේ දකුණතත් වමතත් අතරේ වෙනස නොදන්න එක් ලක්ෂ විසි දහසකට වඩා මනුෂ්‍යයන් ද ගවයන් ද සිටින නිනිවය නම් ඒ ශ්‍රේෂ්ඨ නගරය කෙරෙහි මාත් අනුකම්පා කළ යුතු නොවේ දැ''යි වදාළ සේක.


පිළිතුරු ගීය :මාගේ සමිදුනි ඔබ දයානුකම්පාවේ දෙවිදාණෝ ය .

3 මාගේ සමිඳුනි, මට අනුකම්පා කළ මැනව. මුළු දවස පුරා මම ඔබට අයැදිමි. 
4 ඔබේ දාසයාගේ සිත ප්‍රීතිමත් කළ මැනව. 
මන්ද, මාගේ සමිඳුනි, මම ඔබට යාච්ඤා කරමි. 
5 මාගේ සමිඳුනි, ඔබ යහපත් ය, ඔබ කමා කරන සේක; 
ඔබට අයැදින සියල්ලන්ට තිර පෙම බහුල ව ප්‍රදානය කරන සේක. 
6 සමිඳුනි, මාගේ අයැදුමට සවන් දුන මැනව. 
පිහිට පතමින් මා කරන අයැදුමට කන් දුන මැනව. 

9 මාගේ සමිඳුනි, ඔබ මැවූ සියලු ජාතීහු ඔබ වෙත පැමිණ ඔබට නමදින්නෝ ය.
ඔව්හු ඔබේ නාමය පසසමින් ඔබට ගරු කරන්නෝ ය. 
10 ඔබ බලසම්පන්න ය, අරුමපුදුම දේ කරන සේක. 
ඔබ පමණක් දෙවිඳාණෝ ය. 


සුවිශේෂය /ලූක් 11:1-4

1 උන් වහන්සේ එක් තැනක යාච්ඤා කරමින් සිටි සේක. එය නිම වූ පසු උන් වහන්සේගේ ශ්‍රාවකයන්ගෙන් එක් තැනැත්තෙක් කතා කොට, ''ස්වාමීනි, ජොහන් තම ගෝලයන්ට ඉගැන්වූ ලෙස, අපටත් යාච්ඤා කරන්නට ඉගැන්නුව මැනවැ''යි කීවේ ය. 2 උන් වහන්සේ ඔවුන්ට මෙ‍සේ වදාළ සේක: ''ඔබ යාච්ඤා කරන කල මෙ‍සේ කියන්න: 
'පියාණෙනි, ඔබ වහන්සේගේ නාමයට ගෞරව වේ වා, ඔබ වහන්සේගේ රාජ්‍යය පැමිණේ වා. 
3 අපේ දිනපතා ආහාරය දිනෙන් දින අපට දුන මැනව. 
4 අපේ පව් අපට කමා කළ මැනව; 
මන්ද, අපට ණයගැති ව සිටින හැමට අප කමා වන බැවිනි.
අප පරීක්ෂාවට නොපමුණුවනු මැනව.' ''